भैंसेपाटीमा मन्त्री निवास ९० प्रतिशत निर्माण सम्पन्‍न

काठमाडौं । ललितपुरको भैंसेपाटीमा निर्माण भइरहेका मन्त्री, प्रदेश प्रमुख तथा मुख्यमन्त्री आवास निर्माण करिव अन्तिम चरणमा पुगेको छ ।

०७९ फागुन मसान्तसम्म मन्त्री आवास ९० प्रतिशत र प्रदेश प्रमुख तथा मुख्यमन्त्री आवास ९१ प्रतिशत निर्माण सम्पन्‍न भएको आइतबार सार्वजनिक गरिएको आर्थिक सर्वेक्षणमा उल्लेख छ ।

मन्त्री निवास (दोस्रो चरणको) ३७ प्रतिशत र चन्डी दल भवनको ५८ प्रतिशत निर्माण सम्पन्‍न भएको छ । यस्तै, सिंहदरबारमा निर्माण भइरहेको संघीय संसद भवन ६१ प्रतिशत निर्माण सम्पन्‍न भएको बताइएको छ । 

०७९ फागुनसम्म ललितपुरको गोदावरीमा ३ हजार र रुपन्देहीको बुटवलमा १ हजार व्यक्ति क्षमताको अन्तर्राष्ट्रिय सभाहल निर्माण सम्पन्न भएको छ । गोदावरी सभाहलमा शनिबार ‘मिस नेपाल’को फाइनल आयोजना गरिएको थियो ।

अहिले विभिन्न जिल्लामा १८ सभाहल निर्माणाधीन अवस्थामा रहेको आर्थिक सर्वेक्षणमा उल्लेख छ ।

यस्तो बन्दैछ मन्त्री क्वाटर 

मन्त्री क्वाटरमा धेरै आधुनिक सेवा सुविधाहरु उपलब्ध हुनेछन् । मन्त्री क्वाटरमा हेल्थ क्लब, स्वीमिङ पुलदेखि हेलिप्याडसम्म निर्माण गरिने छ । साथै, ग्रिनरी, कम्युनिटी हल, ग्रोसरी सप लगायत सुविधाहरु पनि दोस्रो चरणमा निर्माण हुनेछन् । 

मन्त्री क्वाटरका भवन नेपाली मौलिक शैलीमा निर्माण गरिँदै छ जहाँ प्रवेशका लागि निजी र सार्वजनिक गरी दुईवटा प्रवेशद्धार हुनेछन् । 

१२ रोपनी क्षेत्रफलमा २७ आवास भवन र ६ वटा अन्य भवन निर्माण हुनेछन भने ३८ रोपनी क्षेत्रफलमा ग्रिनरी हुनेछ । 

आन्तरिक सडकका लागि २१ रोपनी क्षेत्रफल छुट्याइएको छ । यस्तै, ११ रोपनी क्षेत्रफल हेल्थ क्लबका लागि छुट्याइएको छ । ७ रोपनीमा कम्युनिटी हल बन्‍नेछ भने साढे २ रोपनी क्षेत्रफलमा ग्रोसरी सप बन्‍नेछ । 

आवास परियोजनाभित्र मन्त्रीका परिवार, पाहुना लगायतका लागि प्रर्याप्त पार्किङ सुविधा उपलब्ध हुनेछ । त्यहाँ एक सयवटा गाडी पार्किङ गर्न मिल्ने ठाउँ निर्माण गरिनेछ ।

मन्त्री क्वाटरको भुइँतलामा लबी, मिटिङ रुम, मन्त्रीले मान्छे भेट्नका लागि निजी कोठा, कर्मचारी सुत्ने कोठा, गार्ड कोठा लगायत हुनेछन् । पहिलो तलामा मन्त्री सुत्ने मास्टर बेडरुम, परिवारका सदस्यहरु सुत्ने कोठा, बैठक कोठा, भान्छा र डाइनिङ रुम हुनेछन् । दोस्रो तलामा पाहुना सुत्ने÷बस्ने २ वटा कोठा, पुजा कोठा र लाउन्ड्री हुनेछ ।