स्वदेशी सिमेन्टको खपत बढाउन सडक निर्माणमा ढलान प्रविधि अवलम्बन गरिने

काठमाडौं । सरकारले आर्थिक वर्ष ०८०/८१ को बजेटमा पनि सडक निर्माणमा ढलान प्रविधि अवलम्बन गर्ने घोषणा गरेको छ । 

सोमबार संसदमा वार्षिक बजेट प्रस्तुत गर्दै अर्थमन्त्री डा. प्रकाशशरण महतले स्वदेशी सिमेन्टको आन्तरिक खपत बढाउन पक्की सडक निर्माण गर्दा निश्‍चित मापदण्डको आधारमा ढलान गर्ने प्रविधि अवलम्वन गर्ने बताएका हुन् ।

यो प्रविधिबाट टिकाउ र गुणस्तरीय सडक निर्माण हुनुका साथै बिटुमिनको आयात समेत घट्ने विश्‍वास अर्थमन्त्री महतको छ ।

चालु आवको बजेटमा पनि तत्कालिन अर्थमन्त्री जनार्दन शर्मा (प्रभाकर)ले पहाडी क्षेत्रमा सडक निर्माण गर्दा स्वदेशी सिमेन्ट र डन्डीको प्रयोग गर्ने घोषणा गरेका थिए । सडक निर्माणमा कंक्रिट (सिमेन्ट, डन्डी, गिट्टी र बालुवा) प्रयोग गर्ने व्यवस्थाबाट स्वदेशी सिमेन्ट तथा डन्डी उद्योगहरुले बजार पाउनेछन् । 

बिटुमिन र रोडाको मिश्रणबाट कालोपत्रे गरिएको सडकभन्दा सिमेन्ट र रोडाको मिश्रणबाट बनाइने कंक्रिट ढलान बढी टिकाउ हुने सडक विभागको तर्क छ । सिमेन्ट कंक्रिटको ढलान प्रविधि सुरुमा महँगो भए पनि धेरै टिकाउ हुन्छ ।

धौवादी फलाम खानी उत्खनन गरिने

अर्थमन्त्री डा. महतले नवलपरासीको धौवादी फलाम खानीको विस्तृत सर्भेक्षण, विस्तृत परियोजना प्रतिवेदन तयारी र वातावरणीय सम्भाव्यता अध्ययन सम्पन्‍न गरी उत्खनन कार्य प्रारम्भ गर्ने बजेटमा घोषणा गरेका छन् । 

यस्तै, नेपालभित्र खानीजन्य उद्योगको प्रवद्र्धन गर्न दैलेखमा पेट्रोलियम पदार्थ, नवलपरासी र पर्वतमा फलाम, मकवानपुरमा ग्रेनाइट, स्लावस्टोन र सेरामिक्स, अर्घाखाँचीमा चुन ढुङ्गा तथा धादिङमा डोलामाइटको अन्वेषण र उत्खनन कार्य अगाडि बढाइने भएको छ ।