सरकारले बनाइरहेका विशेष भवनहरु कुन–कुन हुन् ? कस्तो छ प्रगति ?

काठमाडौं । शहरी विकास मन्त्रालयले विशेष आयोजनाका रुपमा करिव आधा दर्जन सरकारी भवन निर्माण गरिरहेको छ । जसमध्ये कतिपय भवनको काम सम्पन्‍न भइसकेको छ भने कतिपयको निर्माण जारी रहेको छ ।

विशेष भवन निर्माण आयोजनाअन्तर्गत संघीय संसद भवन, सैंबु भैंसेपाटी मन्त्री आवास, भैंसेपाटीमै प्रदेश प्रमुख र मुख्यमन्त्रीको आवास तथा सम्पर्क कार्यालय, सिंहदरबारमै चण्डीदल गणका लागि भवन निर्माण, प्रधानमन्त्री आवास निर्माण रहेका छन् ।

जसमध्ये प्रधानमन्त्री आवास निर्माण सम्पन्‍न भइसकेको छ । यस्तै, भैंसेपाटी आवास क्षेत्रभित्र बनाइएका प्रदेश प्रमुख र मुख्यमन्त्रीको आवास तथा सम्पर्क कार्यालय पनि केही महिनाअघि प्रधानमन्त्री पुष्पकमल दाहालले उद्घाटन गरिसकेका छन् । तर, भवन निर्माण सम्पन्‍न भएपनि बाहिर बगैंचा, वाटर फाउन्टेन, ग्रिनरी लगायत साजसज्जाका धेरै काम गर्न अझै बाँकी छ । 

शहरी विकास मन्त्रालयका अनुसार सिंहदरबारभित्र निर्माण भइरहेको संघीय संसद भवनको निर्माणतर्फ सम्पूर्ण ब्लकहरुको स्ट्रक्चरको काम करिव सम्पन्न भएको छ । ९ वटा ब्लकको रुफ ट्रसको काम सम्पन्न भएको, ६ वटा ब्लकको छाना छाउने काम सम्पन्‍न भएको, सम्पूर्ण ब्लकहरुमा ब्रिक वर्क कार्य र प्लास्टरको काम करिव सम्पन्‍न हुनै लागेको छ । 

इन्टेरियर कार्यको सम्झौता भइ निर्माण कार्य अघि बढेको छ । यस्तै, गत आवमा उक्त भवन निर्माण कार्यको भौतिक प्रगति करिव २१ प्रतिशत रहेको र समग्रमा भौतिक प्रगती ६६ प्रतिशत पुगेको मन्त्रालयको रिपोर्टमा उल्लेख छ ।

सैंबु भैंसेपाटीमा मन्त्री आवासका २७ वटा ब्लकहरुको स्ट्रक्चर निर्माण र छाना छाउने काम सम्पन्‍न भइसकेको छ । सबै ब्लकहरुमा फ्लोर फिनिसिङ, फल्स सिलिङ, इलेक्ट्रिकल, प्लम्बिङ, डोर एन्ड विन्डोको काम भइरहेको छ ।

मन्त्री आवास आयोजनाकै दोस्रो प्याकेजअन्तर्गत इन्टेरियरतर्फ २७ वटै ब्लकहरुमा फर्निचर र वाल पेन्टिङको काम करिव सम्पन्न हुन लागेको छ । गत आवसको अन्तिमसम्म मन्त्री क्वार्टर निर्माण कार्यको भौतिक प्रगति २० प्रतिशत र समग्रमा भौतिक प्रगती ९२ प्रतिशत पुगेको बताइएको छ ।

मन्त्री निवासकै दोस्रो चरणको कामतर्फ ६ वटा ब्लकमा स्ट्रक्चरको काम सम्पन्‍न भएको छ भने कतिपय फ्लोरमा ग्राउन्ड फ्लोर स्ल्याब कास्टिङ कार्य सकिएको छ । यस्तै, तीनवटा ब्लकमा रुफ ट्रसको काम पनि सम्पन्‍न भइसकेको छ । 

चन्डीगल गणका लागि सिंहदरबारभित्र भवन निर्माण भइरहेको छ । यस भवन निर्माण कार्यको भौतिक प्रगती करिव ५१ प्रतिशत रहेको र समग्रमा भौतिक प्रगाती ६६ प्रतिशत रहेको बताइएको छ ।